猎豹BB，如假包换的广州女生，曾在奢侈品职场打滚，更流连于柴米油盐的生活，会赚钱理财，更爱花钱购物。
悭家Lady
唔係我哋唔识得欣赏名牌，而係会先计下自己荷包有几多斤两；唔係我哋唔买贵嘢，只不过买之前会格下价睇下佢值唔值呢个价。
边个话响广州No fashion？有无听过广东有句口头禅叫“食得招积用得舒适”呀？唔係对生活无追求，只不过你估个个都係含住金钥匙出世嘅有钱佬，日日有条大水喉照住咩！查实，中意广州生活方式的朋友都有个共性，实在！唔係我哋唔识得欣赏名牌，而係会先计下自己荷包有几多斤两；唔係我哋唔买贵嘢，只不过买之前会格下价睇下佢值唔值呢个价。呢D米叫做识悭家啰！当然，我觉得自己係悭家Lady中嘅表表者……
我应该算得上网购嘅骨灰级用家。2003年淘宝一开业，我就已经搬定凳仔霸定头位。果时唔一定要注册账号，你睇中咩产品都可以直接联系卖家线下交易；果时亦唔知咩係支付宝，自己戆居居去银行排队汇款，拿住张汇款凭证直接叫卖家确认发货。我仲好记得第一样网购返来嘅顺嘢係一件红色冷衫，以市价三分一唔使倾掂数，兴奋过中六合彩！后来有一排兴同城交易——查实係为咗悭番D运费，大家倾好价钱，约埋係地铁站交货俾钱，仲会系旺旺度讲好大家点认到大家，例如今日会着住条红裙仔，带住顶Cat帽。次次交易都搞到鬼咁紧张，成日以为自己拍紧谍战片。
我上网买到最大件嘅宝贝係一个名牌浴缸。无错！你无睇错！的确係个浴缸！唉，想起当年买楼，摞晒D老底出来，等到交楼又要装修，个荷包更加奀滋滋， 撞啱我偏偏小资情结泛滥，睇中个按摩浴缸，发梦都谂住晚晚点番盏香熏灯，叹番个泡泡浴；咁先算係真正嘅人生！专卖店度呢个浴缸标价成两万银，就算我扫晒街格晒价，个底价仲要成万五蚊，点计都买唔起！不过我衰硬颈，係要买！点办？唯有死死地气上网揾料。当时网购多数都係买吓衫仔买吓化妆品，竟然比我刮到个牌子有代理商喺网上开店，经过一轮质保认证同价格大战后，五千蚊包邮有交易！悭咗成万银呀！好开心！好开心！几晚瞓唔着，数星星盼月亮等货到。
但呢次网购唯一有样濑咗嘢：拣咗自提。当时对自提没经验没概念，淡淡定趁住午休放饭，偷鸡同朋友自己开车去提货。计住提完货仲够时间请朋友吃个便饭，点使都唔过五百。点知，嗰个自提点竟然响同和镇再上成个钟车程的地方！到已经係下午点半钟！最衰仲係个提货点净係帮你提货，唔包装货卸货！就凭我呢个手无缚鸡之力兼饿到飙烟的女人仔，加埋被我拖落水嘅朋友，边搬得佢郁？！当然，呢个世道总係有钱使得鬼推磨，係俾咗两百蚊搬运工后，费尽九牛二虎之力终于搬到个浴缸上车（我朋友部商务车真係多得我唔少，估计第一次摞嚟运货），已经过咗下午茶时间，又开咗成两个钟终于返到屋企，揾人卸埋货，咁啱就到晚饭时间。
无比内疚自动自觉请朋友食咗个大餐，摞起只碗，只手都仲震吓震吓，又饿又累，成行眼泪。单计搬运邮费已超四百，外加请食饭，接近一千。真係偷鸡唔到蚀把米，欲哭无泪。但自提的挫败抹杀唔到网购嘅成就感，多年来，个浴缸运行一切正常，次次我手痕按下呢个掣，按下嗰个掣，转吓各个按摩制式滋滋柔柔叹浴时，都会谂起买浴缸的趣事，自己忍唔住阴滋阴滋咁笑。哈哈，其实快乐嘅生活就係咁简单！
（责任编辑：侯彦方）